ភ្នំពេញ៖ នៅថ្ងៃអង្គារ ទី១៩ ខែធ្នូនេះ បើតាមគណនីហ្វេសប៊ុករបស់ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌៌ បានឱ្យដឹងថា ពាក់ព័ន្ធនឹងករណីគ្រោះថ្នាក់ចរាចរណ៍នៅក្នុងខណ្ឌទួលគោក ដែលបង្កឡើងដោយរថយន្ត Jeep ពាក់ស្លាកលេខ ភ្នំពេញ ២CB-៩៩៦៣ បណ្ដាលឱ្យមានមនុស្សស្លាប់បាត់បង់ជីវិតនោះ កំពុងទទួលបានការយកចិត្តទុកដាក់ និងមានការណែនាំឱ្យពិនិត្យ ស្រាវជ្រាវ និងធ្វើការដោះស្រាយឱ្យបានត្រឹមត្រូវ និងម៉ឺងម៉ាត់បំផុត ពីសំណាក់ឯកឧត្តម កើត​ រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌៌។ 

មកដល់រសៀលថ្ងៃទី១៩ ខែធ្នូនេះ បើតាមប្រភពដដែលបានបញ្ជាក់ថា ចំពោះករណីគ្រោះថ្នាក់ចរាចរណ៍ខាងលើនេះ ស្ថាប័នអយ្យការអមសាលាដំបូងរាជធានីភ្នំពេញ បានចេញដីកាបញ្ជាឱ្យចូលខ្លួន បង្គាប់ឱ្យជនសង្ស័យបង្ហាញខ្លូននៅអយ្យការអមសាលាដំបូងរាជធានីភ្នំពេញ ឱ្យបានមុនថ្ងៃទី០៩ ខែមករា ឆ្នាំ២០២៤។ ឯកឧត្តម ជិន ម៉ាលីន ក៏បានបញ្ជាក់ថា ដីកាបញ្ជាឱ្យចូលខ្លួននេះ ក៏មានអនុភាពបញ្ជាឱ្យកម្លាំងសមត្ថកិច្ច ស្វែងរក និងនាំខ្លួនជនសង្ស័យមកកាន់អយ្យការផងដែរ ក្នុងករណីមិនព្រមចូលមកបង្ហាញខ្លួន។ ដោយឡែក ចំពោះលទ្ធផលនៃការអនុវត្តដីកាបញ្ជាឱ្យចូលខ្លួននេះ នឹងជូនព័ត៌មានបន្ថែមតាមក្រោយទៀត។

គួររំឮកថា កាលពីថ្ងៃទី១៤ ខែធ្នូ ឆ្នាំ២០២៣ នេះ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាក Jeep Overland ពាក់ផ្លាកលេខ ២CB-៩៩៦៣ ប៉ះជាមួយម៉ូតូមួយគ្រឿង ក្នុងភូមិសាស្រ្ត សង្កាត់បឹងកក់ទី១ ខណ្ឌទួលគោក បង្កឱ្យជនរងគ្រោះឈ្មោះ សៀង គីមហុង ភេទប្រុស ជាអ្នកបើកបរម៉ូតូបាត់បង់ជីវិតនៅកន្លែងកើតហេតុ៕